Celebrazione 25 aprile a Martignacco

Un 25 di Avrîl là che si tegnin cerimoniis cun pôcs di lôr, che a son li su invît par scoltâ discors istituzionâi e meti jù une corone, no si pues calcolâle une vere Fieste de Liberazion. L’an passât, cuant che si cjatavisi denant alc che no si saveve ben cemût frontâlu, si à acetât – ancje se cu la bocje garbe – di no lâ in place. Chest an, invezit, la decision di no autorizâ nissune manifestazion – e si fevele di iniziativis che si lis fâs al viert e si pues organizâlis a distance di sigurece e cu la mascarute intor – no si pues glotile, massime se si pense che si è daûr a autorizâ ativitâts che, sul plan sanitari, a son ben plui riscjosis. Magari cussì no e je la stesse logjiche dal “in fabriche sì” ma “in teatri no” o, par dîle cun altris peraulis, di une lungje rie di sieltis fatis come se la salût psicologjiche des personis e fos separade di chê fisiche, come se o fossin pure espression di materialitât e no ancje di ideis, etiche, culture, passions…

Intindìnsi: chest resonament nol à nuie a ce viodi cul “negazionisim dal virus” che, cun formis e nivei diferents, si à insedât intune part de societât. Al à invezit a ce viodi cu la maniere che si à sielzût par fâi cuintri a cheste crisi sanitarie, une maniere che e je fie di chel model socioeconomic che nus voluce e nus scjafoie, a voltis cence nancje che si rindedin cont. Un model che masse pôcs a metin in discussion e che nol jere ciert chel che a vevin pal cjâf chei fantats e chês fantatis che plui di 70 agns indaûr a àn dât vite a di (e dispès a àn dât la vite par) une Resistence cuintri de violence e de opression dal fassisim e dal nazisim in Friûl, in Italie e in Europe.

Po ben, che e sedi la benvignude cheste fieste de Liberazion dal nazifassisim cu lis placis vueidis, cence cjants e cence slogans… Che e sedi la benvignude se nus jude a fermâsi par un moment a pensâ che cussì no si pues lâ indenant, che al covente un model sociâl, economic e ambientâl diferent. Un model – chel di vuê – che al à par dogmis il stât-nazion e un capitalisim simpri plui agressîf che cumò al vûl meti ancje la aghe sul marcjât finanziari, che al rint simpri plui siôr un numar simpri plui piçul di personis, che al disfrute come se a fossin infinidis lis risorsis di une Tiere che e je la uniche che o vin, che al incrès l’egoisim e che al mude il “diviers” in “nemì”. E pûr – contrari di ce che nus disin – chest nol è l’unic model pussibil. No si trate di jessi radicâi o estremiscj, ma dome di cjalâsi ator e di rindisi conte che si trate prin di dut di sorevivence, di autodifese.

Intal pensâ un model gnûf no si à però vê pôre di cjalâ indaûr o in bande. Se o volìn, cence nissune nostalgjie romantiche e cence colâ tal “si steve miôr cuant che si steve piês”, ancje te nestre storie lontane o resinte lis ispirazions no mancjin. I modei che a funzionin miôr a son chei che a partissin des comunitâts locâls. Comunitâts in stât di decidi dal lôr avignî, solidariis, che a àn cure dal ambient là che a vivin, inlidrisadis te lôr tiere e tal stes timp viertis (parcè che ogni identitât e je plurâl e in evoluzion). Comunitâts che, cuant che al covente, a san alçâsi in pîts, cun braùre e cun determinazion par difindi i dirits menaçâts o lis visions di un avignî di avualiance e di libertât, par dutis e par ducj.

I esemplis no mancjin nancje vuê, cundut che dispès a son cidinâts – cuant che no svilanâts – dai grancj mieçs di comunicazion, des istituzions politichis e economichis. Comunitâts come chê curde che tal Rojava, in cundizions impussibilis, e je daûr a fâ sù une vere democrazie dal bas. Comunitâts come chê catalane che, in maniere pacjifiche e massive, e mostre la strade par une Europe divierse, fate di popui libars e solidaris. Comunitâts come chê de Val Susa là che citadins e aministradôrs locâi no si rindin ai tentatîfs di espropriâ e di militarizâ la lôr tiere pal interès di cuatri afariscj.

Resistence no je une peraule vueide di riclamâ une volte ad an. Se e cuant che o volìn, e vîf intai nestris cûrs, tai nestris cjâfs e tes nestris mans. No je un storie di timps che no son plui, ma e je une pratiche vive e simpri atuâl. No je singolâr, ma plurâl. Ai 25 di Avrîl e ta chei altris dîs dal an. Achì e inaltrò.

Salûts resistents. Salûts antifassiscj.