Ringraziamo Carlo Puppo di questo contributo che ricorda l’impegno di Dino Virgili, di Riedo Puppo e dei tanti giovani che si sono impegnati per riprendere le tradizioni del paese, dare speranza e segni di solidarietà concreta a tutta la comunità.

Domenie ai 19 di Avost dal 1945, juste 80 agns indaûr, al jesseve Strapaese, numar unic dât fûr pe sagre di S. Roc di Sarsêt. Si fevele di un periodic tra i prins a saltâ fûr in Friûl dopo de fin de seconde vuere mondiâl e di fat, par jessi publicât, al veve vût di otignî il vie libare de Aministrazion Aleade che ta chei mês e controlave ancjemò buine part dal Friûl. I articui no son firmâts ma, pe plui part, si pues atribuîju a Bernardino Virgili – Dino dai Bas – che indi jere ancje il curadôr e a Riedo Pup. I tescj – che a fevelin de sagre dal 1945 che dopo agns di vuere e di patiments e ven vivude come une vere fieste de pâs, ma ancje de vite e des tradizions di Sarsêt – a son pe plui part par talian; chel istès il furlan al à une presince impuartante, no dome in tescj poetics e mûts di dî, ma ancje te prose. La publicazion, che e jes come vôs de Union Sportive Virtus di Sarsêt, e je impuartante par vie che, tai fats, e rapresente la prime jessude a stampe di chel grup di zovins che tai agns seguitîfs al metarà lis fondis di Risultive, il circul leterari che al à dât un contribût impuartanton al disvilup de leterature moderne in lenghe furlane. Tai numars seguitîfs di Strapaese, che al jes par diviers agns simpri par compagnâ la sagre di S. Roc, dongje dai elements leâts ae fieste paisane a saltin fûr cun simpri plui evidence ancje contribûts leteraris par furlan, sei in prose, che in poesie. Dopo dal prin an, dongje dai zovins di Sarsêt – Virgili e Pup in primis – che a àn mot i prins pas, sul sfuei a comparissin ancje altris nons che a lassaran la lôr olme ta chê stagjon di rinassince de leterature furlane, tra di lôr Anna Burelli Delendi – che e je vignude a mancjâ juste cualchi dì indaûr –, Ennio Totis, Aurelio Cantoni e vie indenant. In dì di vuê a son pôcs chei che si impensin di cheste publicazion, intant che altris le tegnin juste par un sfueut di paîs. Al è però propit su chês cuatri pagjinis dadis fûr pe sagre di Sarsêt, che si invie il percors di Risultive – prime ancjemò che il grup si des dongje in maniere uficiâl – e che si pues preseâ i prins scrits di personaçs che a àn fat la storie de leterature moderne in lenghe furlane.